top of page
  • Writer's pictureKereama Wright

He Kāwanatanga Hou: He Pakanga Hou

Updated: Nov 30, 2023

E te iwi Māori, karawhiti tauā!
Incoming Prime Minister Luxon with his two deputy's, Winston Peters and David Seymour.
Winston Peters, Kiritopa Luxon, David Seymour

Kua mana te Kāwanatanga hou, me te aha, te hanga nei, ko te iwi Māori hei kai mā ōna matā.


Kua whakawahia a Kiritopa Luxon hei pirimia mō Niutīreni, ko Winston Peters hei pirimia tuarua mō te haurua tuatahi o tēnei huringa pōti, kātahi ka tukua te tūranga ki a David Seymour, te rangatira o te pāti Act.


Hei tā Annette Sykes, "he taniwha tēnei e toru ōna upoko". Hei tā Tuku Morgan, "ko ngā kiōre kāpō e toru." Ahakoa he aha te ingoa ka utaina ki runga ki a rātou, e mārama ana te kite, ko te tāmi i te iwi Māori tōna matua.


Te Aka Whai Ora, Co-Governance, Wāri Māori, Te Reo Māori, Tikanga Māori, Te Tiriti o Waitangi, o tātou whānau kēnge, Mātauranga Māori, Auahi Kore Aotearoa me te huhua noa atu, kua oatitia e tēnei kāwanatanga ka turakina e ia hei ngā marama, me ngā tau e tū mai nei.


E mea ana a David Seymour, he kēhua no Ngāpuhi tonu, ko tāna e whai nei ko te mana-ōritetanga o te katoa. Kia kaua tētahi iwi (Māori) e whai ture motuhake, engari, kia ōrite te mana o tēnā, o tēnā.



Kua whai wāhi atu a Tama Potaka, uri o Mōkai Pātea, Taranaki, Whanganui me Ngāti Toa ki te kāhui kapinēti.


Ka whakawhiwhia ki a ia te tūranga Minita Take Taiao, Minita mō Te Arawhiti, Minita Whanaketanga Māori, Minita Take Whare Tuarua anō hoki. He pīkautanga nui mā te tāhae kua poto iho i te rua tau e mahi ana hei kaitōrangapū.


Hei tāna, ka whai hua tonu te Māori i raro i ngā whakahaere a tēnei kāwanatanga. Ki te ora te ohanga, ka ora te Māori. Hei tāna anō, mā te whakamoe i a Te Aka Whai Ora, ka heke tika atu ngā rauemi e tika ana ki ngā ratonga Māori kei te mātotorutanga o ngā hapori e mahi ana.


Karekau ia e whakaae ki ngā anipā a te iwi Māori, arā, e aro ana tōna kāwana ki te tāmi i tōna iwi Māori.


Hei hoa hāere mōna ko te tautōhito Tararā o Te Aupouri, kō Shane Jones. Kua riro anō i a ia te pōtae Minita Whakawhanake I Ngā Rohe, te Minita i ngā Take Moana, te Minita take Rauemi, ko ia hoki te minita tuarua i ngā take pūtea.


He rangatira ārero pounamu a Shane Jones i te ao Māori, i whāngaia ki ngā kai mārō a ōna pākeke. He kaiporotū i ōna wā, i pakanga mō te mana o te reo Māori, mō te Tiriti o Waitangi anō hoki.


Heoi anō, te hanga nei e noho ana ia hei taituarā mō ngā kaupapa here a Winitana. He tohunga rāua tahi ki tēnei ao tōrangapū, nō reira, hei ngā marama tata nei tātou ka kite i te hua o ā rāua rautaki tāmi i te iwi Māori. Ko te kōrero kei runga, ko te rahurahu kei raro.


Ko Shane Reti hei Minita Hauora, hei Minita hoki mō ngā take o Te Moana Nui a Kiwa.


Ko Karen Chhour nō te pāti Act te Minita Take Tamariki. Māna a Oranga Tamariki e tiaki. He wahine tēnei i whakapakekehia i roto i te kupenga a te Kāwanatanga.


Heoi anō, e whai ana tōna pāti ki te whakakore i te wāhanga 7AA o Te Ture Oranga Tamariki, e whakahau ana i a ia kia whakamanahia ngā mātāpono o Te Tiriti o Waitangi, kia tuarihia te mana whakahaere ki ngā iwi.


Ko Te Hokowhitu a Te Pāti Māori, ko Willie Jackson me tōna kāhui o Reipa, ko Marama Davidson me tōna tira Kākāriki anō hoki hei hoa kakari mō te Kāwanatanga nei.

Nō reira tīkina te kānga pako. Kaore e kore ka tutū te pūehu!


Heoi anō, me karawhiti hoki te iwi Māori. Kaua e noho puku. Kaua e mate wheke. Kaua e waiho mā tētahi atu ngā kaupapa e tohe. E ora ai te reo, kōrerotia. E ora ai ngā tikanga, whakapūmauhia. Kaua mā te waewae tutuki, engari mā te ūpoko pakaru.


Karawhiti Tauā!
4,955 views1 comment

Recent Posts

See All

1 Comment


huakina1
Dec 01, 2023

Kua whiowhio ngā hau ā Tāwhirimātea kia māhea ai te kitea o Ngāitāua e pou ana i ā tāua kara motuhake mai i Te Rerenga Wairua ki te Puka ā Māui.

Like
bottom of page